عارفة يامه للشاعر علي سلامة

عارفه يامه
انا حاسس ان الموت
ماخدتش منك
غير الطرحه
والجلابيه السوده
ما انا كل ما اعدي
جنب الاوضه
اسمع صوتك..
وانتى بتضحكى ع الدني
اوبتدعي لى ...
روح.. ربنا معاك..
ها تسافر..
وهاترجع مجبور الخاطر
وها استناك...
طب اسندى على كتفى
بكره تقومي
بكره تخًفى
عارف مين يا ابنى
بيقع ويقوم
اوعى تدور ع الدفا
فى فلوس وهدوم
ومتنساش تحوش شويه
اصحاب..
وافرح اووى..
لما يدق الباب
وتلاقى حد بيحضنك
لوجه الله..
ياه
فاكره يامه لما كنتي
تعملى بصاره
وتدى منها لابله سارة
يرجع ف الطبق رز باللبن
يروح لام حسين..
يرجع صنيه بسيسه
تدى منها لخالتى بيسه..
يرجع الطبق مليان حب
معقوله فيه كده قلب..!
عارفه يامه
النهارده بقيت بخاف بجد
بخاف من اى حاجه
ومن اى حد..
بخاف غصب عني
اتخبط فى حد
او اطلب من حد يسال علي
لحسن يعمل محضر..
ويرفع قضيه
ويطلب تعويض
من اول هنا يامه
لازم نبدا من جديد
هو الفرح ليه يامه
شكله لسه بعيد؟؟
ادعى لى يامه

ايه رائيكم مش روعة الرجاء الدعاء لاموتنا جميعا بالرحمة والمغفرة

اللهم ارحم موتانا وموتى المسلمين

[ندعوك للتسجيل في المنتدى أو التعريف بنفسك لمعاينة هذه الصورة]

» مصر يامه يابهية
» يامه القمر ع الباب
» من أشعار علي سلامة..
» لا تصالح للشاعر امل دنقل
» انا ارهابي للشاعر احمد مطر