الاعتراف بالخطأ

الاعتراف بالخطأ

كان ياما كان ياسعد ياكرام ولا يحلى الكلام إلا بذكر النبى عليه الصلاة والسلام

كان فيه راجل غني جدا مش عارف يودي فلوسه فين فكر أنه يدهن حيطان بيته بالذهب .

فلف 3 بلاد لحد البلد التالت قابل أكبر تاجر ذهب هناك قام قاله أنا عايز أدهن حيطان بيتي كلها بالذهب .

استغرب التاجر وقاله أدي الذهب لكن أن جار عليك الزمن ابقى تعالي



ضحك الغني وقاله هيجور عليه الزمن في إيه ولا إيه ده أنا عندي قصور وتجارة مالهاش عدد

وراح الغني دهن قصره بالذهب وبقى عجب العجب

وفي يوم تجارته وهي في الصحراء جه عليها التراب قال مش مهم أنا عندي قصر ومليان خزاين مليانة أموال .

بعدها جاله خبر أن البحر بقى عالي وغرق قصره وجرى عليه الزمان .

وراح نفس البلاد لأنه مش قادر يفضل جوه البلد دي بعد ما بقى فقير عدمان



في أول بلد اشتغل صبي عند حلاق .

ولما سأله الحلاق عن غلطته قاله أنا مغلطش طرده الحلاق وقاله لا تحكي لي عن زمانك ولا أحكي لك عن زماني



سافر الراجل اللي كان غني بلد تانية واشتغل صبي حداد .

ولما ما اعترفش بغلطته الحداد قاله نفس الجملة.

فسافر لبلد تالت عند تاجر الدهب .

ولما سأله عن غلطته اعترف وقال غلطتي أني ما أدتش الفقراء من مالي.

فضحك التاجر وقاله إن اللي ادتهولك قبل كده مش دهب ده نحاس وفلوسك عندي أمانة.

وآدي الزمن جار عليك

رجع الغني لبلده قابله الناس بالفرح وقالوا له القصر رجع بعد ما البحر رجع زي ما كان

وتجارتك كلها من التراب نضفناها .

فرح الراجل الغني وقال الإنسان على أد ما يقدر المفروض ما يغلطش .

وإن غلط لازم يعترف بغلطته ولو ما قلش هيشوف الويل في دنيته

وتوتة توتة خلصت الحدوتة