احمد فؤاد نجم

احمد فؤاد نجم الامتداد الطبيعي للنديم وبيرم من افضل شعراء العامية في مصر ان شاء الله سوف اضع اعماله بالتدريج في هذا المكان نبدء بالممنوعات كتبت عام1976 ايام الرئيس الراحل انور السادات

الممنوعات

ممنوع من السفر
ممنوع من الغنا
ممنوع من الكلام
ممنوع من إلاشتياق
ممنوع من إلاستياء
ممنوع من إلابتسام
وكل يوم فى حبك
تزيد الممنوعات
وكل يوم باحبك
أكتر من اللى فات
حبيبتي يا سفينه
متشوقه وسجينه
مخبر فى كل عقده
عسكر فى كل مينا
يمنعني لو أغير
عليكي أو أطير
إليكي واستجير
بحضنك
أو أنام
فى حجرك الوسيع
وقلبك ألربيع
أعود كما الرضيع
بحرقه الفطام
حبيبتي يا مدينه
متزوقه وحزينه
فى كل حاره حسره
وف كل قصر زينه
ممنوع من إني أصبح
بعشقك .. أو أبات
ممنوع من المناقشه
ممنوع من السكات
وكل يوم فى حبك
تزيد الممنوعات
وكل يوم باحبك
أكتر من اللى فات

القاهره / 1976

ربنا يكرمك
وتقدر تخلصهم كلهم

[ندعوك للتسجيل في المنتدى أو التعريف بنفسك لمعاينة هذه الصورة]

أدي مصر
مصر الطحين و الفلاحين و البنايين و السقايين
و الصيادين و المنشدين
و الصنايعيه
مصر النخيل و النيل و الصبر في المواويل و الملاغيه
مصر السمار و العمار
و ابن إياس و الجبرتي
و عجايب الآثار
و حواديت الشاطر حسن و امنا الغوله
و سكه السلامه
و سكه الندامه
و سكه اللى يروح ما يرجعشي
و تعالى يا شاطر نروح القناطر
و البيض الملون و شم النسيم
و مصر النديم
و هوجه عرابي و حرب الطوابي
في وجه الخديو عميل لنجليز
و مصر الملانه و حب العزيز
مصر الكنايس و مصر الجوامع
مصر المزارع و مصر المصانع
و خان الخليلي
و درب الغوازي و سيدنا الحسين
و فرعون و موسى و بركه قارون
مصر العديد و السكه الحديد
و مصطفى كامل و محمد فريد
مصر الموالد و شيلاه يا طاهره
يا ست ام هاشم
يا جبر الخواطر
يا ماري يا جرجس
يا سيدي ابراهيم
تناولوا اللي عايز
و تشفوا السقيم
مدد ثم نظره
في قلب المقام
و نخرج قوام
و نلعب يا حاوي
الطبيب المداوي
و ابو رجل مسلوخه
و الست اللى كلت دراع جوزها
في جنينه الحيوانات
الكلب ابو سنان دهب
و سبحان من وهب
مصر الكتاتب و المدارس
و التلامذه و الثوره و الأناشيد
السجن و السجان
و العشاق المعاميد
مصر "الولاد السمر
خضر العمر
في عموم الحواري" "مصر البنات المخطوبين في المهد لسرير الجواري"مصر
الصيام و السحور
مصر السواحل و البحور
مصر المظالم و البلاوي
و الباش اغا التركي
و ادهم الشرقاوي
مصر الحديثة و رفاعه رافع الطهطاوي
مصر العلوم و الفراعنه
و الطب و التنجيم
مصر محمد علي الفاتح
و ابنه ابراهيم العظيم
مصر الجناينيه و الشيالين
و بياعين العرقسوس و اللمون البنزهير
و خير اللهم اجعله خير
مصر الحضر و الريف
و ازهر العلم الشريف
و سليمان الحلبي
و جمال الدين الأفغاني
و الأمام محمد عبده نعم الأمام
عليه البراوه و عليه السلام
مصر الصعايده و الرشايه و البحاروه
و السواحليه
مصر النهود الشهود
و الرموش السود
و القدود المعجبانيه
مصر الغيطان
و جمال حمدان
و طه حسين و لويس عوض و العقاد
و فؤاد حداد
و نجيب محفوظ
و صلاح جاهين
و البيانولا
و عم بيرم و البراقع و اللبده و الجلابيه
مصر النجوع و الكفور و البلاد
و طلعت باشا حرب زعيم لا قتصاد
مصر الفنون اللي جاءت
و فاقت جميع الظنون
مراسح و سما و نغم و روايات
الشيخ سيد درويش البحر
و بديع الزمان ابن خيري
و عبده الحامولي و سلامة حجازي
و نجيب الريحاني
و عبد الوهاب حبيب الحكومه و الست ثومه
اميره بلاد العرب في الطرب و الآهات
و مصر اللي كانت و مصر اللي جات
مصر المداين و الزقاق
مصر المشلتت و الرقاق
و مختار زمانه و نهضه بهيه
اللي هي الحكايه و هي القضيه
ما تقدرش ترصد جميع المعالم
ما تقدرش تفهم جميع اللغات
خلاصه الكلام انا مستهام و مغرم صبابه و ميت غرام و سهران تملي و مش عايز انام
و كل انشغالي في جوف الليالي
بادور عليه في عالم زحام

استغمايه

غمي عيونك
سد ودانك
إفتح بقك
قول انا فين

الشاطر فيكو
يحزر فزر
في دقيقتين
والإشطر منه
اللي يحزرها
في غمضة عين
والإشطر خالص ما يحزرش
يقول انا فين
والإشطر أشطر
اللي يبص يشوف بالعين
انا فين ؟
فيه ناس
اختلف في الموضوع
وحكاوي اتقالت
عن مواضيع
والناس لا مؤاخذة
في زمن الجوع
يتعشوا كلام
يفطروا تشنيع !

فيه واحد شافني
بلبده ولاسه
في باب اللوق
والتاني
لمحني بقفصين موز
علي باب السوق
والتالت شافني
في كاديلاك
راكب مع بنتين
والرابع
شافني ف طنطا
بابيع
بلابيع ونشوق !
وصحافه الصاوي
والورداوي
والجمال
وأباظه ولاظه
وباقي الدلاديل
والأندال
بتأكد جدا
جدا جدا بالتدقيق
إن انا محبوس
وباروح يوميا
للتحقيق!

طب اصدق مين
وأكدب مين ؟!
ماهي حاجه تمخول أيها عاقل
وانا مجنون
وباكلم نفسي
وعقلي صراحه
ماهوش مضمون
لو كنت بلبده ولاسه
وماشي ف باب اللوق
طب إيه مشاني
مفلس جدا
جنب السوق ؟!
لوكنت بدأت
كتاجر فاكهه
وبقفصين ؟
مش كنت زماني
معلم طمبه
وجوز اتنين؟

لوكنت ف كاديلاك
زي ما قال
التالت بيه
ومعايا بنات
زي الشربات
طب ح انزل ليه ؟!

لوكنت يا طنطا
بابيع بلابيع
وسطل وبخور
مش كنت زماني
مدير على جامع
أو مأمور ؟

وصحيح الصاوي
والورداوي
والجمال
حابسين أفكار الناس
في بلدنا
وعال العال
إياك قاصدين
إن انا مسجون
زي الملايين ؟
كده يبقي تمام
ولأول مره
ح اقول " صادقين "
بس انا لا مؤاخذه
وبالتدقيق
ماحصلشي معايا
ولا تحقيق !
مش حاجه تحير
طب أنا فين ؟
حزرتوا خلاص
فزرتوا خلاص ؟
عارفين
أنا فين
أنا ساكن قلبي ومتونس
بالناس
والناس الونسه كتير
ماليين القلب
وشاغلينه
سارحين في الدم
وفي التفكير
وجناين قلبي العمرانه
بالناس
الأزهار
العصافير
سايعاني
وسايعه اللي باحبه
وتساعي معايا
رفاقه كتير
شايفين انا فين ؟
الشاطر فيكو
يحزر فزر
في دقيقتين
والأشطر طبعا
حيحزرها
في غمضة عين
أنا ...... فين

؟

إصحى يا مصر

اصحى يا مصر
اصحى يا مصر
هزى هلالك
هاتى النصر
كونى يا مصر وعيشي يا مصر
مدي اديكى
وطولى العصر
اصحي وكوني وعيشي يا مصر

اصحى يا عامل مصر يا مجدع
وافهم دورك
ف الوردية
مهما بتتعب
مهما بتصنع
تعبك رايح
للحراميه
جهدك عملك
رزق عبالك
عرقك مرقك
ولا يهنا لك
اصحى يا عا مل
غير حالك
صون المصنع
واصنع مصر
اصحى وكونى وعيشي يا مصر

اصحى يا زارع مصر الخضره
قدره وخضره
ونور وجمال
ابدر غيطك
واحمى البدره
ضد الافه
والاستغلال
ارضك عرضك
باب الدار
صبحوا مداسه
للسمسار
نعطش
ولانشربش عكار
وصفه قالوها الحكما يامصر
اصحى وكونى وعيشي يا مصر

واصحى يا جندى
يا تار الشهدا
عمى وخالك
اختى واخوك
لجل ما تهدا وتارك يهدا
فرغ نارك ف اللى خانوك
يابن الشعب يا حامي الشعب
انت املنا فى يوم الصعب
اصحى يا جندى ودق الكعب
حرر مصر وطهر مصر
اصحى وكوني وعيشي يا مصر

جميلة والله
بس احسن بيت فيها
مصر السمار و العمار
و ابن إياس و الجبرتي

[ندعوك للتسجيل في المنتدى أو التعريف بنفسك لمعاينة هذه الصورة]

أصل الحكاية .... ولد

منين أجيب ناس لمعناه الكلام عارفين
سبه الأمارة
إذا حفضوا الوداد
عارفين
شرعت من القلم رمحي
جرح قمحي
جعلت عشق الغنا زادي
وناس عارفين
يا ليل يا عين يا وطن
يا صحرا يا بساتين
يا جرحي
يا غنوتي
يا ناسي يا غايبين
موالى من غربتي أخضر
خضارة حزين
حزين كلام الغنا
والسامعين عارفين
آه يا زمان الخنا
يا ماشي بالمعكوس
فيك أى شئ ينشري
وكل شئ
بفلوس
حطيت عديم الرجا
ع الخايب المتعوس
خراب
وحاكم أغا
يا قهرة العارفين
ركب الأغا ع البلد
ركب عليها الخوف
خاين قليل التنا
جاهل
عديم الشوف
خان التراب والهوا
خنق الضمير في الجوف
وداس بنعل الوطا
ع الحق
والعارفين
مين في البلد يا بلد
كان صوته من راسه
يحسب
يكيد العدا
ويصون وداد
ناسه
دار المدار بالخبل
وسقانا من كاسه
مين تحت الأغا ينطق
يقول عارفين
يا للي قريتوا الجرايد
كله كلام مغشوش
ومركبين في الصحافه
بتوع
وليها كروش
يدوسوا زر البتاعه
ينزل كلام مطروش
حمضان في حبر المطابع
وكلنا عارفين

أصل الحكايه ولد
فارس ولا زيه
خذ من بلال ندهته
ومن النبي ضيه
وم الحسين وقفته
في محنته
وزيه
قدم شبابه فدا
والحق له عارفين
خالد
يا بن الربيع والأمل
والشمس والزينه
مين يا فتي أعملك
فعل الخريف فينا
وكبرت بره الزمان
اللي ابتلاك بينا
نايمين على وددنا
مع إننا عارفين
صالح من سكون الخرس
كروان بغنيوه
الملك لك يا فتي
يا مصري يا حليوه
رقصت نجوم الفلك
بالضي تتعانق
والشمس ويا القمر
في برجهم
عارفين
شيل الغطا يا عطا
عبد السلام قدد مين
عبد الحميد يا فتي
قطب الرجال يا حسين
داعي المروءة دعي
والعمر مش عمرين
خالد يقول صحبتي
واحنا الجميع عارفين
الله أكبر هنا
ع الباغي والجبار
طعن الفتي طعنته
خار الأغا وانهار
المجد دا ابننا
والفارس الكرار
راكب على مهرنا
والكدابين عارفين
مين يا فتي علمك
لعب العصا ع الخيل
وازاي قطفت القمر
من فوق شواشي الليل
وطبعت نجم السما
بالوشم
على زندك
الأسم : خالد
ولكن
عاشق
ولك هندك
أم الدلال علمك
طبع الأسود عندك
مين يا فتي علمك
عشق الملاح والميل
هندك يا أدهم هنا
أصلك وسلسالك
والناس يا خالد هنا
عمك
هنا
خالك
يا غنوه من قهرنا
إسمك وموالك
ويا العذاب والأمل
فى دمنا
عايشين
وليه أجيب ناس
لمعناه الكلام عارفين
وإحنا الأماره
إذا حفضوا الكتاب
عارفين

الإضراب

باسم الإله الشعب
رب المضربين
الصايم
المحروم على مر السنين
يا منشدين الحي
حيوا حينا
واحنا هنا
ع العهد دايما مخلصين
محلا القصايد
في الشدايد .. والغنا
محلا الكلام الحب
أوقات الشقا
احنا اللي تهنا ع الطريق
من بغضنا
متفرقين
والسجن هوا الملتقي !
آه يا رفاقه
من متاهات الطريق
لما الليالي
بيتخنق فيها القمر
يمشي الصديق
في الضلمه
يخبط في الصديق
والسكه بنت الخطوتين
تاخد سنه !

إحنا النهارده فين
وكام
وبكره كام
وبعده فين ؟
في كل يوم بنزور مكان
وكل يوم
بنزيد عدد
وكل يوم
نفتح بيبان
وكل يوم
بنزيل سدد
وكل يوم
يطلع بنا
وكل يوم
ينزل هدد
وكل يوم
نحبل غنا
وكل يوم
نولد مدد
احنا كده لازم نكون
جوا السجون
برا السجون
محلا القصايد
في الشدايد والغنا
محلا العيدان الخضر
في الربع الخراب
احنا اللي تهنا ع الطريق
من بعضنا
متجمعين
بنخط صفحه في الكتاب
ملعونه قامه تنحني بالقهر
من حاكم .. وخان
ملعونه كلمه تنتني في الحلق
تهرب م اللسان
ملعونه ساعه تنحسب م العمر
يطويها الخنوع
ملعونه لقمه مغمسه بالذل
ملعونه الجبان
آه يا رفاقه
ياللي عملتوا الصلابه للحجر
بانده لكم
وسط الكآبه
والرتابه .. والضجر

يا مقربين الفجر
نوره ومطلعه
مدوا المسامع
في المجامع
واسمعوا
صرخة مغني الحي من جوف العدم
اتجمعوا
اتجمعوا
اتجمعوا

الأقوال الماسورة

المجد للشاه
فى الاعالى
وبالناس المذله
وعلى الارض
الخراب
" شاهبور با ختيار "
من سفر ما قبل الخروج
حبيبك وصاحبك
وصاحب حبيبك
كلام كله فارغ
عديم المعانى
اذا الندل صاحبك
يصاحبك لعله
وتسمع كلام
زي كذب الاغانى
وانا اللى اشتريت الخسيس
بالخساره
وبعت الاصيل
اللى يا ما اشترانى
واول ما هبت
رياح النهايه خلعنى الخسيس
من صباعه ورماني

الشاهنشاه رضا فهلوي

من سفر الخروج
اخويا الامير
بزرميط الايرانى
وعظنى ونصحنى
وسلك ودانى
لان اللى نابه
يا حبه عنيا
ما يتيخلوش
أي كاتب اغانى
دا كان لمسه قاعد معايا
النهارده
ولابس خواتم دهب
امريكانى
صحيح الشعوب
بنت كلب ولتيمه
وممكن
تزيح العروش فى ثوانى

" واحد صاحبنا "
من سفر ما بعد الخروج

الانتخابات

شوف عندك يا سلاملم
واتفرج يا سلام
ع المدعو دومه عيسوي
وزير الإمن عام
فى الفصل الانتخابي
من مرسح السلام
سارح بالبلطجية
والهجامه القدام
عشان ضمان عبوره
من دايرة لانتقام
واتفرج يا سلاملم
على عيسوي يا سلام

- العيسوي بيه
- العيسوي بيه
- صاحب البوجمجراوىات
- العيسوي بيه
- والحبسخناتات
-العيسوي بيه
- ملك اللومانات
- العيسوي بيه
- والمعتقلات
- العيسوي بيه

- بشرى لجميع الهباشه
العيسوي
رمز الطفاشه
سبحان الله
من أومباشه
حكم المأمور يا ماشالله عليه
- العيسوي بيه
- العيسوي بيه

بشرى لجميع الحشاشه
العيسوي بيه
رمز الماشه
سبحان الله من أومباشه
بقي كل الإمن العام فى إديه
- العيسوي بيه
- العيسوي بيه

من أجل ضمان الحرية
لجميع تجار الباطنية
العيسوي بيه ميه الميه
حيخلي القرش
بربع جنيه
- العيسوي بيه
-العيسوي بيه

-خليكوا فاكرين
- العيسوي بيه
-تنتخبوا مين
- العيسوي بيه
- فليحيا أمين
- العيسوي بيه
- ابن أم أمين
-العيسوي بيه
- العيسوي بيه
- العيسوي بيه

الثوري النوري
حلا ويللا يا حلا ويللا
يا خسارة ياحول اللا
الثورى النورى الكلمنجى
هلاب الدين الشفطنجى
قاعد فى الصف اللأكلنجى
شكالاطه وكراميلا
***
يتمرجمجراوى بعض الأيام
يتمسلم بعض الأيام
ويصاحب كل الحكام
وبستاشر ملة
***
ياحلولو لو شفته زمان
مهموم بقضايا الانسان
بيتكتك لا تقول بركان
ولابوتاجاز ولا حلة
***
ايش حالك ياجريبى اليوم
وايش جاب التفاح للدوم
وايش جاب الأوضة ف بدروم
للعربيه وفيللا
***
جرانين ومسارح وادارة
ومعلق طبلة وزماره
يسلك أهو بيزمر
يعطل يجيبوا له المنفيلا
واترستق هلاب الدين
بقى عاقل جدا ورزين
ويا عينى علينا يا مجانين
عشنا ومتنا بعله

الجدع جدع

الجدع جدع
و الجبان جبان
بينا يا جدع
ننزل الميدان

و الميدان بعيد
عن جوف المدينة
يا تار الشهيد
دير ياسين و سينا

بحري و الصعيد
إحنا أهه ادينا
اصلب م الحديد
في الشدة تلاقينا
بالنار و السلاح
نعلن الكفاح
فوق كل العواصف
و هبوب الرياح
يسبق الليالي
و يجيب الصباح
و يهزم الهزيمة
و يداوي الجراح

عاوزين اللي راح
قدامكو الميدان
و الجدع جدع
و الجبان جبان

الحاوي

توت حاوي حاوي توت
خش اتفرج هرج فوت
زاحم لاحم عارك اضرب
ناضل فاضل
خطوة وتقرب
وإلحق نفسك
قبل ما يلعب
وامسك نفسك جوه الملعب
دانت حتضحك لما تموت
توت حاوي
حاوي توت
***
توت حاوي سبع مرات
لعبة جديدة
يا حضرات
دق الفول ويا الكرات
هات الشطه والبهرات
شخبط لخبط حضر طاسه وكب الزيت
ولع طلع ريحه مريحه ف جو البيت
ح تلقى عجينه عجيبة متينة
لا تقول تينه ولا برتينه
كل يا صنايعي
كل يا فقير
كل ماهو لسه الفول قناطير
آه يا سلام لو عود جرجير
تفضل تاكل لما تموت
توت حاوي
حاوي توت
***
توت حاوي حاوي توت
خش اتفرج هرج فوت
قعده فكيهه
حتسمع فيها
حكاية البيضة والكتكوت
يحكى أن
ولازم يحكى
وكان ياما كان
قبل الجنه
كان فيه بيضه وفرخه كمان
دبحوا الفرخه طبت سارخه
قامت البيضه طقت شارخه
طقشت فقست فرخ فصيح
يدن ويهلل ويصيح
حتى إن كان على وش دبيح
يفضل يدن لما يموت
توت حاوي حاوي توت
***
سحر مفيش دا كلام تهويش
نفض مخك يا ابو درويش
كل ما فيها الدنيا دي فيها
ناس بتبكش
لجل تعيش
حابس حابس
عفريت كابس
ينزل قالع يطلع لابس
واللي بيرقص
ع المسامير
واللي بإبره بيفحت بير
واللي بينفخ في المزامير
يفضل ينفخ لما يموت
توت حاوي
حاوي توت

الحمدلله

الحمد لله خبطنا
تحت بطاطنا
يا محلا رجعه ظباطنا
من خط النار
يا اهل مصر المحميه
بالحراميه
الفول كتير والطعميه
والبر عمار
والعيشه معدن واهي ماشيه
اخر اشيا
مادام جنابه والحاشيه
بكروش وكتار

ح تقول لى سينا وما سينا شي
ما تدوشناشي
ما ستميت اوتوبيس ماشى
شاحنين انفار
ايه يعني لما يموت مليون
او كل الكون
العمر اصلا مش مضمون
والناس اعمار

الحمدلله وأهي
ظاطت
والبيه حاطط
في كل حته
مدير ظابط
وإن شالله
حمار

ايه يعني فى العقبه جرينا
ولا ف سينا
هى الهزيمه تنسينا
اننا احرار
ايه يعني شعب ف ليل ذلة
ضايع كله
دا كفاية بس اما تقول له
احنا الثوار

الحمد الله ولا حولا
مصر الدوله
غرقانة فى الكدب علاوله
والشعب احتار
وكفايه اسيادنا البعدا
عايشين سعدا
بفضل ناس تملا المعده
وتقول اشعار
اشعار تمجد وتماين
حتى الخاين
وان شا الله يخربها مداين
عبد الجبار

الخط دا خطي

الخط دا خطي
والكلمة دي
ليا
غطى الورق غطي
بالدمع يا عنية
شط الزتون شطي
والارض عربية
نسايمها انفاسي
وترابها من ناسي
وان رحت انا ناسي
ما تنسانيش هى
والخط دا خطي
والكلمة دى ليا
لاكتب على عينى
يحرم عليكى النوم
واحبس ضيا عينى
بدموعى طول اليوم
قبل الوفا بديني
زي الصلا والصوم
والدين فى عرف الحر
هم ومذلة ومر
وشجون تصون وتجر
احزان مخبية
والخط دى خطي
والكلمة دى ليا
لاكتب على كفي
والحبر من دمي
ياهمتي كفي
يا عزوتى ضمي
اول ما ح نوفي
بالوعد
ح نسمي
باسم اللى ماتوا صغار
فى المدرسه والدار
والمصنع اللي انهار
فوق الصنا يعية
والخط دا خطي
والكلمة دى ليا

الخواجة الامريكانى

الخواجه الامريكانى
والسماسرة اللى وراه
تخنوا بالكدب ودنه
وعرضوا له مقاس قفاه
فهموه
من غير ما يفهم
ان سوق الشرق مغنم
والخوجه بطبعه مغشم
والمصاري معفرتاه
حب يعمل فيها تاجر
وانطلق
يسلب وينهب
ف الجمجراوىاين بالنهار
يحدف الدولار يلمه
تلتميت مليون دولار
بالقزايز والبنات
باللبان
والبمبونات
بالمدافع والدانات
او بأفلام الرعاة
قول بقي تاجر وفاجر
وانفلت لص المواشي
رعب ماشي فى البلاد
يشفط البترول ويطرش
كل الوان الفساد
عزرائيل من غير فرامل
يقلب العرسان ارامل
حتى فى بطون الحوامل
كان بيدبح الحياة
بالسناكي والخناجر
والنهايه يا خواجه
مش ف يوم كانت بدايه ؟
البدايه برضه لازم
ييجي يوم
توصل نهايه
مهما زاد الراسمال
الهلاك هو المآل
والتاريخ
هو اللى قال
لعبه الموت فى الحياة
تسحب الروح م الحناجر

الشاعر الأكره
أنا الأديب لما أتكلم ما باخليشى
لأني جاهل
وفاجومي
ومخ مفيشي
وأي تغيير في حياتي
ميتعبنيشي
وأنا اللي قولي على نويى
مش من بره
وأبدأ كلامي عن الأشعار
واللي زانوها
بيرم وخيرى
وكل الناس اللي صانوها
أما الكلاب عند الجواسيس
واللي خانوها
فدول كلاب
وما مبنذكروش هنا بالمره
الله الله يابدوي
هنا بالمره
***
ياعم بيرم وحياتك
واللي أماتك
وخلا الناس مآبين
عايشيين على مقالاتك
وواد مباحث يتطاول
على مقاماتك
لاجعل الشعرا الأندال
مسخه وعبره
الله الله يابدوى
هنا بالمرة
***
فى كل مولد ياشويعر
لفلفت حزام
ورقصت تبع المزيكة
وكنست مقام
وصاحبت كل الألاتية
ومشيت خدام
لكل عالمة وشبشبها
حسب الأجرة
***
حرباية يابن الحرامية
مية المية
على كل لون جاهز تركب
ع التسقية
أما انت مالح ومجمجراوىط
وابن غبية
وحصانك اللي راهنت عليه
يخسر بكره
الله الله يابدوى
يخسر بكره
***
الطبل غير الشعر يا واد
ماتهبلشي
وأى شخص يكون شاعر
مايطبلشي
ياتقول كلامك جواك
يا متقبلشي
ملعون ابوك طالع نازل
شاعر أكره

الشربة العجيبة

البلى بم بم
والبلى باه
قال لك ايه
قال لك اه
شربه عجيبه
من تركيبه
بلدي
يا بلد البلي بلي باه
قال لك ايه
قال لك اه

شوف يا موطن
شوف يا امير
واسبق شوفك بالتفكير
ناس بيقولوا السر ف بير
ادى البير
وادى غطاه
والبلى بم بم
والبلى باه
قال لك ايه
قال لك اه

قال لك
اكل الفول بيقوت
قال بيقوت
قال لك
حشو المعده يموت
قال لك
صهين
قال لك فوت
كل دا كدب
الناس كا شفاه
زى ما كشفوا
البلى بلى باه
قال لك ايه
قال لك اه

أي مواطن يا ولداه
زاده الفول
لازم تلقاه
عندهالبنكرياس
بطال
والامساق
فوق الاسهال
عنده الرهقة
عنده الدوخة
عنده انيميا
عنده عيال
قال لك
ثم الجهل مصيبه
مولف ويا العيا
تركيبه
تشرب منها
تعطش تانى
تشرب
تعطش
تشرب تاني
تعطش تشرب
خمسه ف سته
ميه نار
لو طالت جته
لازم تلحس
اثمن حته
يعني المخ يا خلق الله
ادي البير
وادي غطاه
والبلي بم بم
والبلي باه
قال لك ايه
قال لك اه

قال لك تصبر ع المكتوب
زي ما صبر النبي ايوب
يعني
تسلم للميكروب
يا خد رزقه
بفضل الله
يفضل ينحل وبرك لما
تتفر فط من وسط اللمه
خايخ نخب السوس في عضاك
خلا قوايمك
ما هي شايلاك
ويعالجوك الناس بالصبر
مع انك عيان بالصبر
قومك صبر
ونومك صبر
لحد القبر ياحول الله
وحياتك من الدار للنار
تتولف عند العطار
يسقيك الحكمه ف اشعار
ويركب م الصبر دواه
وتقربع
والداء عمال
ف عضام الابعد نحال
وتخلف للبؤس عيال
وبهيه صيبه يا ولداه
ادي البير
وادي غطاه
والبلى بم بم
والبلي باه
قال لك ايه
قال لك اه

بعد الكشف بميكرسكوب
شفنا التوب
وما تحت التوب
تشكيله امراض عشناها
واليكم فى الاتي
دواها
وصفه عجيبه من تركيبه
بلدى
يا بلدى البلى بلي باه
قال لك ايه
قال لك اه

وجع الراس ح نعالجه بايه
قال لك تدى الناس القوت
قال لك طب والجهل يا بيه
قال لك سيب الكلمه تفوت
طب والكلمه تفوت ازاي
قال لك لما الضلمه تموت
طب والضلمه تموت ازاي
قال لك لازم بالبنوت
والنبوت حنجيبه منين
قال لك لما نهز التوت
قال لك قدر خفنا نهز
قالك
نشرب صبغة يوت
ح تطهر ايوب من صبره
وتفجر كيد المكبوت
وتفوق يونس من نومته
ويفلفص
من بطن الحوت
ادي البير
وادي غطاة
وادي وجعنا
وادي دواه
والبلي بم بم
والبلي باه
قال لك ايه
قال لك اه

القاهره / 1986

الفول واللحمة
عن موضوع الفول واللحمة
صرح مصدر ال مسئول
ان الطب اتقدم جدا
والدكتور محسن بيقول
ان الشعب المصري عموما
من مصلحته يقرقش فول
حيث الفول المصري عموما
يجعل من بني ادم غول
تاكل فخدة في ربع زكيبة
تسمن جدا تبقي مهول

ثم اضاف الدكتور محسن
ان اللحم دي سم اكيد
بتزود اوجاع المعدة
وتعود على طولة الايد
وتنيم بنى ادم اكتر
وتفرقع منه المواعيد
واللي بياكلوا اللحمة عموما
حيخشوا جهنم ده اكيد

يا دكتور محسن يا مزقلط
يا مصدر يا غير مسئول
حيث ان انتوا عقول العالم
والعالم محتاج لعقول
ما راي جنابك وجنابهم
في واحد مجنون بيقول
انتوا سيبونا نموت باللحمة
وانتوا تعيشوا وتاكلوا الفول

ما راي جنابك وجنابهم
مش بالذمة كلام معقول !!

انا رحت القلعة

انا رحت القلعة و شفت ياسين
حواليه العسكر و الزنازين
و الشوم و البوم
و كلاب الروم
يا خسارة يا أزهار البساتين
عيطي يا بهية على القوانين

انا شفت شباب الجامعة الزين
احمد و بهاء
و الكردي و زين
حارمينهم حتى الشوف بالعين
و ف عز الضهر مغميين
عيطي يا بهية على القوانين

و قابلت سهام
في كلام إنسان
منقوش و مأثر في الجدران
عن مصر و عن عمال حلوان
مظاليم العهد المعتقلين
عيطي يا بهية على القوانين

و قابلت هناك
منذر و زياد
و قابلت كمان عزت و جواد
أربع أبطال
شنقوا الجلاد
"التل" يهوذا الفدائيين
زغرطي يا بلدنا لدول مساجين

و اسمعي يا بلدنا خلاصة القول
و بقولك أهه و أنا قد القول
مش ممكن كده حيحول الحول
على كده و الناس يفضلوا ساكتين
خليكوا فاكرين
خليكوا شاهدين
انا رحت القلعة و شفت ياسين

يتمتع احمد فؤاد نجم بتاريخ لا جدال ولا خلاف عليه شكرا على المجهود يا جبرتي

[ندعوك للتسجيل في المنتدى أو التعريف بنفسك لمعاينة هذه الصورة]

كفاية ياحاجة
وشك بقى عامل زي فردة الكاوشت

:lol!: :lol!: :lol!: :lol!: :lol!:

» كلب الست احمد فؤاد نجم
» احمد فؤاد نجم والزعيم عبدالناصر
» علشان انت مصرى احمد فؤاد نجم
» صور سعد الدين فى خطوبة احمد عادل عبد المنعم على ابنة احمد ناجى
» اصابة محمد فؤاد فى السدوان والكتثير من الجرحى