دورت عليك
يآبا
بصيت حوليا
ما لقيتك
يا بنتى مش لازم أكون جنبك عشان اكون معاكى
كفايه انك تحسى انى لسه جواكى
بس يآبا انا محتجالك جنبى
محتجالك تبعد عنى كل الناس الوحشه
يا بنتى انا عارف انك قويه
لا..لا كنت زمان
لكن دلوقتى
ملانى الضعف
لا يا بنتى
قلبك هو قوتك
طيبتك هى سلاحك
مين قال كده يآبا
القلب كان سر شقائى
والطيبة كانت سكينة فى ايد الى حواليا
بيقطعونى بيها
وعمر عنيهم ما دمعت وهما شايفين دمى
عمرهم ما حسوا بالندم
يا بنتى مهما الناس ظلموكى
مهما قسيوا عليكى
حقك هيرجعلك
بس انتى صلى وادعى
عيطى لربنا
وهو هيرجعلك حقك
ياااااااااااااه يآبا
وحشتنى قوى
بجد وحشتنى
وانتى كمان يا بنتى
بس انتى عارفه ان ده مقدر ومكتوب
مقدر اموت واسيبك عيله صغيرة
تعيشى يتيمة
محتاجة للحنان
بس صدقينى يا بنتى
انتى جواكى كل الحنان
اوعى تفقدى الثقه فى نفسك
اوعى تفقدى الثقه فى ربنا
استغفرى الله يا بنتى
استغفر الله
ايوه كده
وامسحى دموعك
انا مقدرش دلوقتى امسحهالك
من وانا صغيره يآبا
من ساعة ما سبتنى
وكمى هو اللى بيمسحلى دمعتى
من ساعة ما سبتنى يابا وانا تايهه
كنت زى السفينه الى تاهت فى البحر
من غير بوصلة
كنت محتاجة حد يساعدنى
كنت محتاجه حد احس معاه بالحب
يمكن اتسرعت كتير
وحسيت من ناس كتير انهم فرسان أحلامى
لكن يآبا مكنوش غير لصوص لأحلامى
وصحيت فجأة على صراخها
وهما بيسرقوها
كانت بستنجد بيا
الحقينى قبل ما يقتلونى
وجريت
وجريت
لكن ولا عمرى لحقتها
ودبحوها
ومقدرتش غير انى اشوف دمها
ياااااااااه يآبا يارتنى كنت مت ساعتها
ياريت التراب كان هو الى مسح دمعى
ياريت التراب هو الى كان شفى جرحى
لكن الظاهر يآبا مكتوب عليا اعيش كده
عايشة ومش عايشة
يمكن لو كنت مت كنت ارتحت
ياااااااااااااه يا بنتى
كل ده حصلك
واكتر يآبا
انا استحملت كتير
وصبرت
يا بنتى
مهما عانيتى
مهما تعبتى
مهما الناس ظلموكى
مهما الدنيا قسيت عليكى
افتكرى ربنا
وادعيله
هو الوحيد الى هينصفك
عينه يا بنتى لا تغفل ولا تنام
صليله ركعه فى قلب الليل
فالحق عمره ما يضيع عند الرحمن
أحمد
سعيد
موضوع: وكبرت يآبا وعدت الأيام ( عامية مصرية ) 
