الحقو مدرس رياضة بيكتب شعر

"دفتر تحضير"
ينزف
قلمك لاحمر
على أوتار الصفحة
يعزف بالأهداف
مقطوعة درس جديد
الهدف الأول
"أن يعرف"
الهدف الثانى
"أن يستنتج"
الهدف التالت
" أن يدرك"
وطريقة عرض الدرس
مشاع
بتكيّف كل همومك..
بطريقتك
وبتطوى ملامح درسك
تقفل كراسة تحضيرك
من غير ما تحط سؤال تقويم
وتنام وبتحلم تتحقق
اهداف الدرس
*******
"جوة الفصل"
بصباع طباشير
ابيض..
من كل قلوب اولادك
تكتب ع السبورة
سين او صاد
يمكن..
تقدر مرة تفك معادلة روحك
تكتم بوحك
جوة دواير من غير مركز
وبتفاصيل الوهم
التايه فيك
دِبّ صوابعك جوة ف سدرك
طلّع ضلع...اتنين
والتالت
حاول بيهم ترسم طيف
لمثلث متساوى الأضلاع
توه فى زوايا الشكل
وف أبعاده
دارى العجز الساكن
برّة ملامحك
واسال تلاميذك
عن أطوال اضلاع الدنيا
دوّر فيهم
يمكن تلقى حلول
لمعادلة روحك
وان ملاقيتش
ماتستغربش
مانت أساساً ماكتبتش
عنوان الدرس
****
"فسحة"
ترصد عينك
كل فَرَاش الحوش
تحسد جنا حات التلاميذ
الفاردة شراع للغد
وتسابق روحهم
ضىّ الشمس المالى
براح النفس
تسأل روحك
هما بيضحكوا للدنيا
ولاّ ياربى فهموا الدرس
****
"مراويح"
خِلص اليوم
خِلصِت روحك
من مشاويرالهم الشابك
جوة عيونك؟؟؟
من مداويرالحلم
الشايلُه ف ننى الجوف؟؟
أرقام وحروف و الوف
أسئلة مخنوقة تشق الحلق
وتنشّف ريق إجابات
مزروعة ف عقل الخلق
وف عقلك
ألف معامل
طارح بُرعم رمز
****
ح تروّح
تشرح حصة ف درس خصوصى
وتدوّر عل دفتر تحضيرك
وتحاول تعزف بالاهداف
مقطوعة درس جديد
بس اسأل نفسك فى الاول
هو انت اساساً عارف
كانت ايه اهداف الدرس؟؟؟؟؟؟؟؟؟
__________________

حرّص من الايام لتبعترك
وامسك فى ناسك دة الامل مشترك
واربط حزام الزمن على وسط افكارك
واياك فى يوم حمل الهموم يجمجراوىرك

تحب ارد زى بقيت الأعضاء ولا تحب اقول اللى فى نفسى
اولا : الكلام جميل
ثانيا : مش جديده عليك
ثالثا: ابنك الكبير حب بس يقلك انو بقى معاك فى المنتدى وخلى بالك علشان هيخطف منك الأنظار
ربنا يعزك يا باشا ويقدرنا ونكون ابناء بارين بوالدينا